Mantemento web: que inclúe e por que o necesitas
Actualizacións, copias que se poden recuperar, vixilancia desde fóra e formularios comprobados cada día. Que inclúe un mantemento web de verdade, contado con casos reais.
Por Miguel A. Taboada· 9 min de lectura
Un mantemento web serio inclúe sete cousas: actualizacións, copias diarias gardadas fóra do servidor e probadas, vixilancia de caídas desde fóra, bloqueo de ataques, dominio e certificado SSL ao día, formularios comprobados e un pouco de tempo para cambios pequenos. Necesítalo porque unha web non avisa cando deixa de funcionar: simplemente deixa de traerche clientes, e moitas veces tardas semanas en decatarte.
Levo anos coidando webs de artistas, escolas e pemes, e case todos os sustos que vin tiñan algo en común: a web parecía perfecta. Cargaba, víase ben no móbil, as fotos estaban no seu sitio. O problema estaba debaixo, onde ninguén mira. Neste artigo cóntoche que fago eu cando mantendo unha web, tres historias reais (sen nomes) e as preguntas que lle deberías facer a quen coida a túa.
Que inclúe un mantemento web de verdade?
«Mantemento» é unha palabra que cada un usa como quere. Para algúns é actualizar o WordPress de cando en vez; para min é que a túa web estea viva, segura e vixiada todos os días do ano. Isto é o que considero imprescindible:
| Tarefa | Que fai | Que evita |
|---|---|---|
| Actualizacións | Sistema, xestor de contidos e complementos ao día | Que alguén entre por unha porta coñecida e sen pechar |
| Copias verificadas | Unha copia cada noite, gardada fóra do servidor | Perder a web enteira por un erro, un ataque ou un disco que morre |
| Vixilancia desde fóra | Un servizo externo comproba sen parar que a web responde | Que a web estea caída un fin de semana sen que ninguén o saiba |
| Bloqueo de ataques | Quen proba contrasinais queda bloqueado de xeito automático | Accesos indebidos ao panel ou ao correo |
| Dominio e SSL | Renovacións controladas e o cadeado do https sempre en regra | Que a web desapareza ou o navegador diga «sitio non seguro» |
| Formularios comprobados | Unha proba real cada día, de punta a punta | Perder mensaxes de clientes sen sabelo |
| Cambios pequenos | Textos, fotos, datas, horarios | Que a web quede vella porque «xa o cambiarei» |
Hai dúas palabras nesa táboa que marcan a diferenza entre un mantemento bo e un de papel: verificadas e desde fóra. Unha copia que nunca se probou a restaurar é unha esperanza, non unha copia. E unha web que se vixía a si mesma non avisa cando cae, porque cando cae ela tamén cae o vixilante.
Que pasa cando ninguén mira? Tres historias reais
Estas tres historias son de webs que coido ou que coidei. Non levan nomes, pero pasaron tal e como as conto.
Un mes sen mensaxes e a web perfecta. A web dun cliente tiña un formulario de contacto polo que lle chegaban inscricións. Tras un cambio na forma de publicar a web, a comprobación antispam quedou sen unha clave de configuración, e dende ese día as mensaxes deixaron de enviarse. A web víase igual ca sempre; o formulario deixaba escribir e todo parecía normal. Pasou un mes ata que alguén se decatou. Desde entón, un sistema propio envía cada mañá unha proba real por cada formulario que coido e comproba que a mensaxe chega de verdade. Se non chega, avísame.
Unha mudanza que ninguén notou. En setembro de 2026 cambiei de casa as webs e o correo dun cliente: dun aloxamento compartido (un servidor repartido entre moitos descoñecidos) a un servidor propio. Preparei todo no servidor novo, copiei webs e caixas de correo coas mesmas contrasinais, comprobei que funcionaban e só entón pasei as DNS a Cloudflare. O cliente non tivo que tocar nin o móbil nin o ordenador. Así debería ser sempre: o mantemento bo nótase precisamente porque non se nota.
Tres contrasinais mal un martes pola mañá. Os bloqueos automáticos de ataques avísanme por Telegram, e o aviso distingue un acceso sospeitoso desde España dun ataque desde o estranxeiro. Parece un detalle, pero non o é: moitas veces o «acceso sospeitoso» é o propio cliente, que se trabucou coa contrasinal do correo. Se o sei ao momento, chámoo e desbloqueo en cinco minutos. Se é un ataque desde fóra, queda bloqueado sen máis.
Tes máis detalle desta forma de traballar no caso de servidores e seguridade.
Que sustos son os máis habituais se non mantés a túa web?
Non quero meterche medo: a maioría das webs sen mantemento seguen funcionando días, meses ou anos. O problema é que non sabes cando deixarán de facelo nin por que. Estes son os sustos que máis vexo:
- O dominio caduca. A tarxeta coa que se pagaba cambiou, o aviso ía a un correo que xa ninguén le, e un día a web e o correo desaparecen.
- O certificado SSL non se renova. O navegador empeza a mostrar «sitio non seguro» e a xente marcha antes de ler nada.
- Un complemento vello abre a porta. Unha web antiga sen actualizar nun servidor compartido é unha porta de entrada para todo o que hai ao lado: se entran por ela, poden chegar a outras webs e ao correo.
- A web cae e ninguén o sabe. Un venres pola tarde algo falla e ata o luns ninguén o ve. Se ese fin de semana tiñas unha campaña ou unha estrea, perdíchela.
- Non hai copia. Ou hai unha, pero estaba no mesmo servidor que se estragou. Volver empezar custa moito máis ca calquera mantemento.
Como sei se as miñas copias de seguridade serven de algo?
Preguntando tres cousas: onde están, cada canto se fan e cando se probou a última vez restaurar unha. As miñas fanse cada noite e gárdanse nun almacenamento separado, en casa, fóra do servidor onde vive a web. Ademais, cada día gárdase unha instantánea que se conserva 14 días, así que podo volver a calquera día das dúas últimas semanas. Isto importa máis do que parece: ás veces un erro non se descobre ata dez días despois, e unha copia só da noite anterior xa traería o erro dentro.
E quen vixía ao vixilante?
Hoxe vixío 23 webs desde fóra, día e noite, como as vería calquera visitante. Se unha deixa de responder, chégame un aviso ao instante. Pero aprendín algo co tempo: un vixilante que falla en silencio é peor ca non ter ningún, porque dá unha tranquilidade falsa. Crees que todo vai ben porque non chegan avisos, e resulta que non chegan porque o sistema que os mandaba parou. Por iso teño tamén un «vixilante dos vixilantes»: se unha das pezas que vixían deixa de funcionar, iso tamén me avisa.
Que lle deberías preguntar a quen mantén a túa web?
Se xa tes alguén que che coida a web, mellor. Fai estas preguntas; se as respostas son claras, estás en boas mans:
- Onde están as miñas copias? Deberían estar fóra do servidor da web.
- Cando foi a última restauración probada? «Nunca» é unha resposta sincera, pero preocupante.
- Quen se entera se a web cae un domingo? E como: un correo que ninguén le non conta.
- De quen é o dominio? Debe estar ao teu nome, aínda que o xestione outra persoa.
- Comprobades os formularios? Non abondo con que a páxina cargue: a mensaxe ten que chegar.
- Que pasa se deixamos de traballar xuntos? Tes que poder levar a web, o dominio e o correo a outro sitio sen reféns.
Canto custa o mantemento dunha web?
Depende de canto queiras delegar. Como referencia, o mantemento anual dunha web sinxela sae por 280 € + IVE. Se prefires unha cota mensual con todo incluído, estes son os meus paquetes (prezos sen IVE):
| Paquete | Desde | Que inclúe |
|---|---|---|
| Coidado | 35 €/mes | Servidor propio ou supervisión do teu aloxamento, actualizacións, copias, vixilancia de caídas e intrusións, dominio e certificado, e media hora ao mes para cambios pequenos |
| Presenza | 75 €/mes | Todo o de Coidado, máis SEO continuo e unha revisión cada tres meses de como apareces nas respostas da IA |
| Dirección | 150 €/mes | Todo o anterior, máis horas de proxectos novos e contido asistido por IA |
Tes o detalle en Coidado da túa web e todos os paquetes na sección de prezos. Se a túa web está vella ou lenta e pensas que xa non paga a pena mantela, bótalle un ollo a como fago as webs novas.
Preguntas frecuentes
Que inclúe o mantemento dunha web?
Un mantemento completo inclúe actualizacións do sistema e dos complementos, copias diarias gardadas fóra do servidor e probadas, vixilancia de caídas desde fóra, bloqueo de ataques, renovación do dominio e do certificado SSL, proba dos formularios e tempo para cambios pequenos de textos, fotos ou datas.
Cada canto hai que actualizar unha web?
As actualizacións de seguridade deberían aplicarse en canto saen, e o resto revisarse polo menos unha vez ao mes. O importante non é a frecuencia exacta senón que alguén o faga con regularidade e comprobe despois que a web segue funcionando.
Necesito mantemento se a miña web case non cambia?
Si. Aínda que ti non toques nada, o servidor, o dominio, o certificado e os complementos si cambian, e os ataques automáticos non distinguen entre webs activas e tranquilas. Unha web estática, sen xestor de contidos, necesita menos mantemento, pero non cero.
Canto custa manter unha web?
Como referencia, o mantemento anual dunha web sinxela sae por 280 € + IVE. En unmedia, o paquete mensual Coidado custa desde 35 € ao mes sen IVE e inclúe servidor, actualizacións, copias, vixilancia e seguridade.
Que pasa co meu dominio e o meu correo se cambio de quen me mantén a web?
O dominio debe estar sempre ao teu nome, e así podes levalo onde queiras. Nunha mudanza ben feita prepárase todo no servidor novo, cópianse webs e correos coas mesmas contrasinais e só ao final se cambian as DNS, polo que non perdes mensaxes nin tes que reconfigurar nada.
Miguel A. Taboada
Deseño e desenvolvo webs, apps e IA útil desde Vigo. Escribo sobre o que vexo cada semana coidando webs de artistas, escolas e pemes.