Bono IA. Chega cos deberes feitos.
O Goberno prepara unha axuda de 600 millóns para que as empresas metan a intelixencia artificial na súa forma de traballar. Aínda non se pode pedir. Aquí tes o que está por escrito, o que falta e o que podes ir facendo para que, cando se abra, o teu proxecto xa estea claro.
Actualizado o 28 de outubro de 2026 · Miguel A. Taboada, Unmedia (Vigo)
- Que é: o «bono empresarial de intelixencia artificial», un dos 14 proxectos do Plan IA360 que presentou o Goberno en setembro de 2026.
- Que paga: proxectos de IA feitos por empresas tecnolóxicas europeas que acheguen traballo propio: desenvolvemento, integración, datos ou redeseño de procesos.
- Que non paga: a simple subscrición a ferramentas como ChatGPT, Claude ou Copilot.
- Como se cobrará: por fitos, con formación do equipo e medindo despois se mellorou a produtividade.
- Cando: piloto no primeiro semestre de 2027 e convocatoria xeral antes de que remate 2027. Hoxe non se pode pedir.
- Que podes facer xa: escoller un problema, medilo e ordenar os teus datos. Máis abaixo explícocho paso a paso.
Separar o oficial do que se supón.
Moita da información que circula sobre o Bono IA son suposicións a partir do Kit Digital. Esta táboa distingue o que di o documento do plan do que aínda non dixo ninguén.
| Dato | Estado | Que sabemos |
|---|---|---|
| Dotación | Oficial | 600 millóns de euros. |
| Empresas beneficiarias | Oficial | Obxectivo de 25.000 empresas transformadas. |
| Que financia | Oficial | Servizos e solucións de IA de empresas tecnolóxicas europeas con valor engadido propio. |
| Licenzas | Oficial | Non financia a mera subscrición a licenzas. |
| Forma de pagamento | Oficial | Pagamentos por fitos, con condicións de formación en IA dos traballadores. |
| Requisitos do proxecto | Oficial | Diagnóstico previo de madurez, un caso de uso concreto e medición posterior do impacto. |
| Calendario | Oficial | Piloto no primeiro semestre de 2027; convocatoria xeral antes de final de 2027. |
| Contía por empresa | Pendente | Nin importe, nin tramos, nin porcentaxe subvencionable. |
| Quen pode pedilo | Pendente | O plan fala de empresas e pemes; os autónomos non aparecen de forma expresa. |
| Organismo que o xestiona | Pendente | Non está dito. Dáse por feito que será Red.es, como o Kit Digital, pero non é oficial. |
| Como se adhiren os provedores | Pendente | O procedemento aínda non existe: hoxe ninguén é «provedor oficial» do Bono IA. |
Paga cambiar como traballas, non mercar unha ferramenta.
O que encaixa
- Un asistente conectado ao teu catálogo e á túa axenda que lles contesta aos teus clientes.
- Ler albarás ou facturas e pasalos sós ao teu programa de xestión.
- Ordenar e clasificar as mensaxes que entran pola web, o correo ou WhatsApp.
- Refacer un proceso, como orzamentos, pedidos ou atención, coa IA dentro.
- Modelos que funcionan nun equipo propio cando os datos non poden saír da casa.
O que non encaixa
- Pagar un ano de ChatGPT, Claude ou Copilot para o equipo.
- Mercar licenzas dunha ferramenta que ninguén vai conectar con nada.
- «Algo de IA» sen un problema concreto detrás.
- Un proxecto sen forma de medir se funcionou.
Cinco pezas que xa están no plan.
A convocatoria non existe, pero o documento si di que terá que ter cada proxecto. É o que convén preparar.
Diagnóstico
Unha foto previa de como de preparada está a túa empresa: datos, programas e procesos.
Caso de uso
Un problema concreto que a IA vai resolver. Un, ben definido, mellor ca cinco vagos.
Pagamentos por fitos
O diñeiro chega a medida que o proxecto avanza, non todo por adiantado.
Formación
As persoas que van usar a ferramenta teñen que aprender a usala.
Medición
Ao final compróbase o impacto na produtividade. Sen unha cifra de partida non hai con que comparar.
Primeiro, un piloto
Unha primeira fase para validar o modelo antes de amplialo. Non haberá para todos desde o principio.
O plan presentouse antes de que se convocasen eleccións xerais. Desde o 29 de novembro haberá un Goberno en funcións, e o razoable é pensar que as bases do bono agardarán polo novo Goberno, que tamén podería cambialo. Como o calendario xa era de 2027, prepararse non é tempo perdido: o diagnóstico e o caso de uso sérvenche con bono ou sen el.
O que nos toca de preto.
- Red NEURONA. O bono vai ligado a unha rede de centros onde as empresas poderán ver a IA funcionando no seu sector e probala cos seus datos, a menos de 50 quilómetros. Primeiro, un piloto con 100 pemes en dúas comunidades antes de que remate 2026; en 2027, dez comunidades e 5.000 empresas. Aínda non se sabe se Galicia estará entre as primeiras.
- CESGA. O centro de supercomputación de Galicia, en Santiago, é unha das fábricas de IA que xa funcionan en España: unha das pezas nas que se apoiará a rede.
- Igape. En 2026 a Xunta tivo unhas axudas cun nome parecido, IA360 para o tecido industrial. Son outro programa e o seu prazo xa pechou. Convén vixiar a sede da Xunta por se saen axudas galegas que se sumen.
O máis probable é que si.
As axudas públicas adoitan usar a definición europea de peme. É de agardar que o Bono IA tamén a use, aínda que as bases aínda non o din.
| Tamaño | Persoal | Facturación ou balance |
|---|---|---|
| Microempresa | Menos de 10 persoas | Ata 2 millóns de euros |
| Pequena | Menos de 50 persoas | Ata 10 millóns de euros |
| Mediana | Menos de 250 persoas | Ata 50 millóns de facturación ou 43 millóns de balance |
E se son autónomo? O plan non o di. No Kit Digital os autónomos entraban como a empresa máis pequena, e é lóxico pensar que aquí será parecido, pero non hai nada escrito. En canto o haxa, poñereino aquí.
Cinco pasos para non chegar coas mans baleiras.
Cando saen estas convocatorias adoita haber poucas semanas e repártense axiña. Quen xa sabe que quere facer, e canto lle custa hoxe, vai por diante.
Escolle un problema
O que máis horas che come: contestar sempre o mesmo, pasar datos a man, preparar orzamentos.
Mídeo hoxe
Horas á semana, erros, tempo de resposta. É a túa cifra de partida, e o bono vaina pedir.
Ordena os teus datos
Catálogo, tarifas, preguntas frecuentes, pedidos: en dixital e nun só sitio.
Proba en pequeno
Unhas semanas de proba dinche se a idea funciona antes de pedir diñeiro para ela.
Pensa no teu equipo
Quen vai usar a ferramenta e como vai aprender. A formación será condición.
Desconfía
De quen che asegure xa un importe ou che cobre por «reservarche» o bono. Hoxe non se pode reservar nada.
Da idea ao proxecto, listo para cando se abra o prazo.
- Concretamos xuntos o caso de uso e a cifra de partida.
- Montamos un piloto pequeno para ver se funciona de verdade.
- Déixoo todo documentado: o proceso de antes, o de despois e como se mide.
- Desenvolvemento e integración á medida, desde Vigo, con modelos en local cando os datos son sensibles.
Unmedia non é «provedor oficial» do Bono IA porque esa figura aínda non existe. Cando se abra a adhesión, contareino nesta páxina.
Cóntame que che quita tempo e dígoche se ten sentido como proxecto de IA. Se non o ten, tamén cho digo.
Avísote cando saian as bases.
Un correo cando se publique a convocatoria, co que cambia para o teu caso. Nada máis.
O que máis se pregunta sobre o Bono IA.
-
Pódese pedir xa o Bono IA?
Non. A 28 de outubro de 2026 non hai bases nin convocatoria. O plan prevé un piloto no primeiro semestre de 2027 e a convocatoria xeral antes de que remate 2027.
-
Canto diñeiro dá o Bono IA a cada empresa?
Non se sabe. O plan fixa 600 millóns de euros en total e un obxectivo de 25.000 empresas, pero non a contía por empresa nin a porcentaxe que cubrirá. Desconfía de quen che asegure xa unha cifra.
-
Págame a subscrición a ChatGPT, Claude ou Copilot?
Non. O plan di que o bono non financiará a mera subscrición a licenzas. Paga servizos que cambien como traballa a túa empresa: desenvolvemento, integración cos teus programas, tratamento de datos ou redeseño de procesos.
-
Poden pedilo os autónomos?
O documento do plan fala de empresas e de pemes, sen mencionar os autónomos de forma expresa. En axudas anteriores, como o Kit Digital, os autónomos entraban como microempresa. Haberá que agardar polas bases para sabelo con seguridade.
-
É o mesmo que o Kit Digital?
Non. Son programas distintos. O Bono IA está pensado para proxectos de IA con traballo propio do provedor, que transformen un proceso e se midan despois, non para comprar unha solución de catálogo.
-
Afectan as eleccións do 29 de novembro?
Poden atrasalo. Coas Cortes disoltas e un Goberno en funcións desde o 29 de novembro, o previsible é que as bases agarden polo novo Goberno. O calendario do plan é de 2027, así que aínda hai marxe, pero nada está garantido.
-
Que podo facer agora para non chegar tarde?
Escoller un problema concreto, medir canto che custa hoxe, ordenar os teus datos e, se podes, probar unha solución en pequeno. Con iso terás o diagnóstico, o caso de uso e a cifra de partida que pide o plan.
-
É Unmedia provedor adherido do Bono IA?
Aínda non o é ninguén: o procedemento para que os provedores se adhiran aínda non existe. Unmedia é unha empresa tecnolóxica europea, con sede en Vigo, que desenvolve e integra solucións de IA á medida. Cando se abra a adhesión, explicareino aquí.
Para comprobalo pola túa conta.
- Documento do Plan IA360 (A Moncloa). O bono é o proxecto tractor 11; a Red NEURONA, o 10.
- Nota de prensa da presentación (A Moncloa).
- Sede electrónica de Red.es, onde se publicaron as convocatorias do Kit Digital.
- Sede electrónica da Xunta, para as axudas galegas.
Tes unha idea para o Bono IA?
Cóntama agora, con calma, e non con présas cando se abra o prazo.