Páxina web para fisioterapeutas: que necesita a web da túa clínica

A páxina web dun fisioterapeuta ten que resolver, desde o móbil e en poucos segundos, catro dúbidas de quen ten dor: quen o vai tratar, se tratades o seu, canto custa a sesión e como pide cita. Iso conséguese cunha páxina por tratamento ou problema (lumbalxia, cervicais, lesións deportivas, chan pélvico…), o equipo con nome, foto e número de colexiado, prezos claros, e un botón de cita ou de WhatsApp sempre á vista. Ademais, por ser unha profesión sanitaria colexiada, a web ten que levar os teus datos de colexiación e tratar con coidado calquera dato de saúde.

Pensa en como chega un paciente novo: leva dous días co lombo bloqueado, está no sofá ou no traballo, e busca no móbil «fisioterapeuta preto» ou «fisio para lumbalxia en Vigo». Ve tres ou catro clínicas en Google Maps, entra na web de cada unha e escolle a que lle dá confianza máis axiña. Non compara deseños: quere saber se o ides entender, se estades preto e se pode ir mañá. Aí gáñase ou pérdese a cita.

Que ten que ter a web dun fisioterapeuta?

• Que tratas, explicado como o diría o paciente. Ninguén busca «terapia manual ortopédica»; busca «dor de costas», «tendinite», «escordadura de nocello» ou «fisio despois do parto». Usa as súas palabras e logo explica a túa técnica.
• O equipo, con caras. Nome, foto real, formación e en que se especializou cada un. En fisioterapia escóllese unha persoa, non un local.
• Prezo da sesión e dos bonos, se os tes. Se non podes dar un prezo pechado, polo menos un «desde» e que inclúe a primeira visita.
• Como é a primeira visita. Canto dura, que hai que levar (informes, probas, roupa cómoda) e se se trata ese mesmo día.
• Pedir cita en dous toques: chamar, WhatsApp ou cita en liña, co botón visible en todas as páxinas.
• Enderezo, horario, aparcadoiro e accesibilidade. Para alguén que chega con dor, saber se hai ascensor ou onde aparcar non é un detalle.
• Se traballas con mutuas ou aseguradoras, cales, e se atendes a domicilio, en que zonas.

Con iso, unha web pequena xa funciona. Os artigos, os vídeos de exercicios e a historia da clínica suman, pero despois.

Unha páxina por tratamento ou todo nunha lista?

É a decisión que máis diferenza hai entre unha web que trae pacientes e unha que só fai de tarxeta de visita:

Non fai falta empezar con vinte. Cos catro ou cinco problemas que máis ves en consulta xa cobres a maioría do que busca a xente.

Cita en liña, WhatsApp ou teléfono?

Depende de como traballes, e poden convivir. De menos a máis:

1. Chamar e WhatsApp. Abonda se levas ti a axenda e prefires falar antes co paciente.
2. Un formulario de cita que che chega ao correo ou ao móbil, e confirmas ti.
3. Axenda en liña: o paciente ve os ocos libres e reserva ao momento, con recordatorio. É o que máis citas fóra de horario recolle, porque moita xente busca fisio pola noite.

Se usas un programa de axenda ou de xestión da clínica, o normal é ligalo ou incrustalo na web, non duplicar a axenda.

Que datos legais ten que levar a web dun fisioterapeuta?

Ademais do aviso legal, a privacidade e as cookies que leva calquera web profesional, a fisioterapia é unha profesión colexiada, e o artigo 10 da LSSI pide nese caso que a web indique:

• O colexio profesional ao que pertences e o teu número de colexiado (en Galicia, o Colexio Oficial de Fisioterapeutas de Galicia).
• O teu título e o país da UE onde se expediu, coa súa homologación se a houbo.
• As normas profesionais que se aplican á túa profesión e onde se poden consultar.

Se na clínica traballades varios, o cómodo é poñer o número de colexiado de cada un na súa ficha do equipo. Explícoo enteiro en que textos legais son obrigatorios nunha web.

E unha cousa propia do sector: a publicidade de servizos sanitarios ten normas. Na web, nada de promesas de curación nin de resultados garantidos («adeus á dor en tres sesións»). Explica que fas e para que adoita servir; se dubidas con algunha mensaxe, o teu colexio oriéntate.

Podo preguntar no formulario que lle pasa ao paciente?

Con coidado. Para o RXPD, os datos de saúde son unha categoría especial (artigo 9) e piden máis protección ca un nome ou un teléfono. E un dos seus principios é pedir só os datos necesarios. Na práctica:

• O formulario de contacto ou de cita, o xusto: nome, teléfono ou correo, e como moito un campo libre opcional cun aviso de que non fai falta dar detalles médicos. A historia clínica faise en consulta.
• Nada de subir informes ou resonancias por un formulario normal da web. Se necesitas recibir documentos antes da visita, mellor pola canle segura do teu programa de xestión.
• Se a axenda en liña é doutra empresa, esa empresa trata datos dos teus pacientes por ti: necesitas un contrato de encargado do tratamento con ela, e a túa política de privacidade debe mencionalo.
• Web con HTTPS e formularios que cheguen a un correo profesional, non a unha conta persoal compartida.

Podo poñer opinións e fotos de pacientes?

As recensións viven mellor na túa ficha de Google, e desde a web podes ligar a ela. Se queres amosar algunha na web, que sexa real, copiada tal cal e coa súa data. Coas fotos, máis coidado aínda: unha foto na que se recoñece a alguén na túa padiola di que é o teu paciente, e iso xa é un dato de saúde. Só co seu consentimento por escrito, e se non o tes, mellor fotos das instalacións, do equipo ou de mans e material sen caras.

E Google Maps?

Para unha clínica de fisioterapia, a ficha de Google pesa tanto coma a web: é onde te atopa quen busca «fisio preto». Escolle ben a categoría principal (a máis concreta que te describa), pon o horario real e liga a ficha á web, e á páxina de cita se a tes. Que o nome, o enderezo e o teléfono coincidan nas dúas axuda a Google a fiarse. Cóntoo paso a paso en como saír en Google Maps en Vigo.

Erros que vexo a miúdo en webs de fisioterapia

• Unha lista de técnicas sen explicar (punción seca, EPI, diatermia…) que o paciente non entende e Google non relaciona co seu problema.
• Fotos de banco de imaxes dunha clínica que non é a túa. Nótase, e resta confianza xusto onde máis importa.
• Sen prezos nin idea do que custa. Moita xente non chama se non sabe se o pode pagar.
• O teléfono agochado ao final da páxina, ou un formulario que ninguén revisa.
• Formularios que piden demasiado: DNI, data de nacemento e a lesión con detalle antes da primeira visita.
• Sen datos de colexiación, que ademais de obrigatorios dan confianza.

Canto custa a web dunha clínica de fisioterapia?

Como referencia, sen IVE: unha web dunha soa páxina, con tratamentos, equipo, prezos, mapa e botóns de chamar, WhatsApp e cita, parte de 600 €. Unha web de ata seis páxinas (por exemplo, inicio, tres ou catro tratamentos e contacto) parte de 1.400 € e inclúe o primeiro ano de coidado. Cada idioma extra son 125 €. Conectar unha axenda en liña que xa uses adoita ser sinxelo; un sistema de citas a medida orzaméntase á parte. Tes máis detalle en canto custa unha páxina web, e se che interesa unha axuda pública para dixitalizarte, en axudas á dixitalización de pemes en Galicia.

Como o fago eu?

Fago webs rápidas, pensadas primeiro para o móbil, en galego e castelán (e inglés se fai falta), cunha páxina por tratamento escrita coas palabras dos teus pacientes, o equipo cos seus datos de colexiado, e formularios que piden o xusto e cumpren o RXPD. O dominio e a web son teus. Tes todo en webs que se atopan, e se tes unha clínica de fisioterapia en Vigo ou arredores, pídeme orzamento e dígoche que necesitaría a túa.